Man Utd គ្រោងកម្ទេច Old Trafford សង់កីឡដ្ឋានថ្មីលំដាប់ទី២នៅអឺរ៉ុប
យោងតាមប្រភពព័ត៌មាន Daily Mail ចេញផ្សាយកាលពីថ្ងៃចន្ទទី២៩ ខែកក្កដា ២០២៤ បានឱ្យដឹងថា ក្លឹបបិសាចក្រហម Manchester United ចង់សាងសង់កីឡដ្ឋានថ្មីដែលមានសមត្ថភាពផ្ទុកទស្សនិកជនបានចំនួន១០ម៉ឺននាក់ ដើម្បីជំនួសពហុកីឡដ្ឋានចាស់ Old Trafford ។ ផែនការលម្អិតរបស់របស់ពួកគេនឹងត្រូវប្រកាសនៅចុងឆ្នាំនេះ។ គម្រោងសាងសង់ពហុកីឡដ្ឋានថ្មីនេះមានតម្លៃ២,៥ពាន់លានដុល្លារ ហើយវាអាចនឹងត្រូវបញ្ចប់ត្រឹមឆ្នាំ ២០៣០ ។ក្រោយសាងសង់រួចវានឹងក្លាយជាកីឡដ្ឋានធំជាងគេទីពីរនៅអឺរ៉ុប បន្ទាប់ពីកីឡដ្ឋាន Nou Camp របស់ក្លឹប Barcelona ដែលមានកៅអីអង្គុយចំនួន១០៥០០០នាក់ ។
United ត្រូវការពេលវេលាដើម្បីធ្វើការសម្រេចចិត្តចុងក្រោយថាតើត្រូវសាងសង់ឡើងវិញ ឬអភិវឌ្ឍទៅលើពហុកីឡដ្ឋានចាស់ Old Trafford ឡើងវិញ ប៉ុន្តែវាច្បាស់ណាស់ដែលថាសហម្ចាស់ក្លឹបថ្មីលោក Sir Jim Ratcliffe ចង់វាយកម្ទេចពហុកីឡដ្ឋានចាស់ដែលមានរយៈពេល១១៤ ឆ្នាំ និងសាងសង់ថ្មីឡើងវិញ។ ជុំវិញនឹងការចំណាយលុយដ៏ច្រើននេះក្លឹបមិនអាចមានលទ្ធភាពដោយខ្លួនឯងទេ សូម្បីតែមានការគាំទ្រពីលោកRatcliffe និងម្ចាស់ភាគហ៊ុនជាច្រើនដូចជាពីគ្រួសារ Glazer ក៏ដោយ។ ការលក់សិទ្ធិដាក់ឈ្មោះកំពុងត្រូវបានពិចារណា ទោះបីជា United ទទូចថាអ្នកគាំទ្រនឹងត្រូវបានពិគ្រោះយោបល់លើដំណើរការនោះ។
ក្លឹបកំពុងសម្លឹងមើលឱកាសផ្តល់មូលនិធិសាធារណៈ និងឯកជនសម្រាប់កីឡដ្ឋានថ្មី និងការបង្កើតឡើងវិញយ៉ាងទូលំទូលាយនៃតំបន់ជុំវិញ Old Trafford ដែលត្រូវបានគេស្គាល់ថាជា Stadium District នៅលើដីដែលជាកម្មសិទ្ធិរបស់ក្លឹប។ បញ្ហាចំណាយដ៏ច្រើននេះនៅតែជាឧបសគ្គដោយសារតែវាមានទំហំធំបើប្រៀបធៀបទៅនឹងការកែលម្អកីឡដ្ឋានដែលមានស្រាប់ត្រូវចំណាយប្រហែលត្រឹមតែ១,៤ពាន់លានដុល្លារប៉ុណ្ណោះ៕
