Haaland ដាក់ទណ្ឌកម្មខ្លួនឯងប្រាំពីរម៉ោងលើយន្តហោះ
Erling Haaland បានបង្ហោះវីដេអូនៅលើ Instagram អំពីរបៀបជិះយន្តហោះដ៏ចម្លែករបស់គេដែលធ្វើឱ្យមានការភ្ញាក់ផ្អើលយ៉ាងខ្លាំង។ ការភ្ញាក់ផ្អើលក៏ដោយសារតែរូបគេជិះយន្តហោះដោយព្យាយាមនិន្នាការថ្មី មួយដែលភាសាអង់គ្លេសគេហៅថា Raw-dogging...។ Raw-dogging គឺជានិន្នាការថ្មីមួយដែលមនុស្សស៊ូទ្រាំនឹងការហោះហើររយៈពេលយូរដោយមិនបរិភោគ ផឹកទឹក ឬរីករាយជាមួយការកម្សាន្តណាមួយ ដូចជាស្តាប់តន្ត្រី ឬមើលភាពយន្តជាដើម។
វាជាបញ្ហាលំបាកគួរឱ្យភ្ញាក់ផ្អើលដែលតម្រូវឱ្យរូបគេមានការដាក់វិន័យពិតប្រាកដនិងភាពរឹងមាំផ្លូវចិត្ត។ Haaland បានបង្ហោះវីដេអូដែលខ្លួនសម្លឹងមើលមុខត្រង់កន្លែងអង្គុយ ហើយបានសរសេររៀបរាប់ថា ទើបតែហោះបាន ៧ ម៉ោង គ្មានទូរសព្ទ មិនគេង មិនទឹក គ្មានម្ហូបអាហារ គ្រាន់តែសម្លឹងមើលទៅផែនទីមួយប៉ុណ្ណោះ។
Manchester City បានបញ្ចប់ការប្រកួតមុនបើករដូវកាលរបស់ពួកគេនៅសហរដ្ឋអាមេរិកដោយយកឈ្នះ Chelsea ៤-២។ វាជារាត្រីដ៏ល្អមួយសម្រាប់ Erling Haaland ខណៈដែលខ្សែប្រយុទ្ធន័រវេសបានស៊ុតបញ្ចូលទីបានមួយគ្រាប់នៅនាទី៥៦។ Haaland គឺជាតារាមួយរូបក្នុងចំណោមតារាមួយចំនួនដែលបានធ្វើដំណើរទៅកាន់សហរដ្ឋអាមេរិក ខណៈដែលគាត់មិនបានចូលរួមក្នុង Euro ២០២៤ ដោយសារតែការខកខានរបស់ន័រវេសក្នុងវគ្គជម្រុះ។ ក្រុមបានវិលត្រឡប់មក វិញភ្លាមៗបន្ទាប់ពីការប្រកួតដើម្បីត្រៀមខ្លួនប្រកួតពានរង្វាន់ Community Shield ទល់នឹង Manchester United នៅថ្ងៃសៅរ៍ទី ១០ ខែសីហា៕
