កូនប្រុស Beckham ព្យួរស្បែកជើងបាល់ទាត់ប្តូរអាជីពថ្មី
Romeo Beckham កូនប្រុសអតីតខ្សែបម្រើជម្រើសជាតិអង់គ្លេស David Beckham បានសម្រេចចិត្តលាឈប់ពីបាល់ទាត់ដើម្បីបន្តអាជីពជាអ្នកបង្ហាញម៉ូដ ដែលជាក្តីស្រមៃរបស់រូបគេ។ យោងតាមប្រភពមួយបានប្រាប់សារព័ត៌មាន The Sun ថា Romeo បានសម្រេចចិត្តព្យួរស្បែកជើងបាល់ទាត់និងលះបង់ពេលវេលាលើសមរភូមិវាលស្មៅរបស់រូបគេ ដើម្បីចាប់អាជីពជាអ្នកតារាម៉ូដែលវិញ ។
ថ្មីៗនេះ Romeo បានចុះហត្ថលេខាជាមួយភ្នាក់ងារម៉ូដកំពូលមួយនៅទីក្រុងប៉ារីស ហើយមានទស្សនវិស័យក្នុងការធ្វើការជាមួយម៉ាកយីហោធំៗមួយចំនួន។ វាជាការសម្រេចចិត្តដែលធ្វើឱ្យគេដើរតាមគន្លងម្ដាយរបស់រូបគេ។ Romeo វ័យ ២១ឆ្នាំ សង្ឃឹមថានឹងចុះហត្ថលេខាជាមួយហាងម៉ូដប៉ារីស Safe Management ដើម្បីក្លាយជាតារាម៉ូដែល។
ការសម្រេចចិត្តលាឈប់ពីបាល់ទាត់វាមិនមែនមានន័យថា Romeo រូបគេលេងមិនល្អនោះទេ។ រូបគេបានលេង២៦ប្រកួតឱ្យក្លិប Inter Miami ដែលជាសហកម្មសិទ្ធិរបស់ឱពុកស៊ុតបញ្ចូលទីបាន ២ដង ក៏ដូចជាកត់ត្រា និងជួយមិត្តិរួមក្រុមបាន១០ដង មុនពេលចូលរួមជាមួយ Brentford ។ Romeo បានចុះកិច្ចសន្យាជាមួយក្លិប Brentford នៅក្នុងក្របខណ្ឌ Premier League តាំងពីរដូវក្តៅឆ្នាំ២០២៣ បន្ទាប់ពីបានចុះកិច្ចសន្យារយៈពេលមួយឆ្នាំជាមួយនេះ។ ចាប់តាំងពីពេលនោះមក ខ្សែបម្រើស្លាបវ័យ២២ ឆ្នាំរូបនេះបានលេងឱ្យក្រុមយុវជន Brentford B ប៉ុណ្ណោះ៕
