ជាលើកទី១ ក្នុងរយៈពេល ២០ឆ្នាំ Messi និង​ Ronaldo គ្មានវត្តមានក្នុងបញ្ជីឈ្មោះ ៣០នាក់ចុងក្រោយពាន Ballon d’Or

វាជាលើកដំបូងក្នុងរយៈពេល ២០ ឆ្នាំដែល Lionel Messi និង Cristiano Ronaldo មិនមានឈ្មោះក្នុងបញ្ជីកីទ្បាករ៣០នាក់ចុងក្រោយ នៃពានរង្វាន់កីទ្បាករឆ្នើមប្រចាំឆ្នាំ Ballon d’Or ឆ្នាំ២០២៤ ទ្បើយ ចាប់តាំងពីឆ្នាំ ២០០៣ មកម្ល៉េះ។ Lionel Messi ដែលមានវ័យ ៣៧ ឆ្នាំកំពុងប្រកបអាជីពបាល់ទាត់នៅសហរដ្ឋអាម៉េរិកធ្លាប់ឈ្នះពានរង្វាន់ខាងលើនេះច្រើនជាងគេរហូតដល់ ៨ លើករួចមកហើយ ខណៈដែល Cristiano Ronaldo ដែលមានវ័យ ៣៩ ឆ្នាំក៏ឈ្នះបាន ៥ លើកផងដែរ។ 

យ៉ាងណា​ ទោះបីជាមិនមែនឈ្មោះ Messi និង Ronaldo ពិតមែន ប៉ុន្តែបេក្ខភាពប្រជែងយកពានរង្វាន់ខាងលើនេះភាគច្រើន គឺកីទ្បាករមកពីក្លិប Real Madrid  ប៉ុណ្ណោះ។ ខ្សែបម្រើ Jude Bellingham របស់ Real Madrid ត្រូវបានរំពឹងថានឹងឈ្នះពានរង្វាន់ខាងលើនេះ បន្ទាប់ពីកីទ្បាករអង់គ្លេសវ័យ ២១ ឆ្នាំរូបបានជួយឱ្យ Real Madrid ឈ្នះ UEFA Champions League, Super Cup, La Liga និង Spanish Super Cup។ មិនត្រឹមតែប៉ុណ្ណោះ រូបគេក៏បានជួយឱ្យក្រុមជម្រើសជាតិអង់គ្លេស ទ្បើងទៅវគ្គផ្តាច់ព្រ័ត្រ Euro ឆ្នាំ២០២៤ ផងដែរ ប៉ុន្តែបានត្រឹមជើងឯករងប៉ុណ្ណោះ។ 

ជាមួយគ្នានោះ ខ្សែប្រយុទ្ធ Lamine Yamal, Dani Olmo របស់ក្លិប FC Barcelona និង Nico Williams របស់ Athletic Bilba ដែលទើបតែនឹងឈ្នះពានរង្វាន់ Euro ឆ្នាំ២០២៤ ជាមួយក្រុមជម្រើសជាតិអេស្ប៉ាញ ក៏ដូចជាកីទ្បាករ Real Madrid ផ្សេងៗទៀតដូចជា Vinicius Jr, Toni Kroos, Federico Valverdel, Dani Carvajal, Kylian Mbappe​ និង Antonio Rudiger សុទ្ធតែមានឈ្មោះក្នុងបញ្ជី ៣០ នាក់ក្នុងការប្រជែងពាន Ballon d’Or ឆ្នាំ២០២៤។ គូរបញ្ជាក់ថា ពិធីប្រគល់ពានរង្វាន់ Ballon d’Or ឆ្នាំ២០២៤ នឹងត្រូវធ្វើទ្បើងក្នុងទីក្រុងប៉ារីស ប្រទេសបារាំង នៅថ្ងៃទី២៨ ខែតុលា ឆ្នាំ២០២៤ ខាងមុខ៕