Ronaldo រិះគន់គ្រូបង្វឹកបិសាចក្រហម Man Utd

Cristiano Ronaldo បានរិះគន់លោក Erik ten Hag គ្រូបង្វឹកក្លិបបិសាចក្រហម Manchester United ដោយនិយាយថាក្លឹបនេះត្រូវតែ កសាងអ្វីៗគ្រប់យ៉ាងឡើងវិញទាំងអស់ ដើម្បីប្រកួតប្រជែងដណ្តើមពានរង្វាន់ដ៏ធំបំផុតម្តងទៀត។ Ronaldo ដែលធ្លាប់រួមរស់ជាមួយក្លិប Man Utd ២លើកមុនពេលចាកចេញទៅក្លឹបអារ៉ាប៊ីសាអូឌីត Al-Nassr បានប្រាប់លោក Rio Ferdinand នៅក្នុងកម្មវិធី ផតខាស់ (Podcast ) ថាលោក Erik ten Hag និយាយថាពួកគេមិនអាចប្រកួតប្រជែងដើម្បីឈ្នះពានPremier League និង Champions Leagueទេ។ក្នុងនាមជាគ្រូបង្វឹក Manchester United អ្នកមិនអាចនិយាយថាអ្នកនឹងមិនតស៊ូដើម្បីឈ្នះពាននៅក្នុងលីគ ឬ Champions League នោះទេ។

យើងមិនអាចនិយាយបំបាក់ទឹកចិត្តកីឡាករថាយើងគ្មានសក្តានុពលនោះទេ ប៉ុន្តែយើងត្រូវនិយាយថាយើងនឹងព្យាយាមធ្វើវា។ Ronaldo បានបន្តថាអ្វីដែលខ្ញុំប្រាថ្នាសម្រាប់ Manchester United គឺចង់អោយក្លឹបនេះក្លាយជាក្រុមល្អបំផុតដូចដែលពួកគេធ្លាប់ធ្វើបាន។ ខ្ញុំស្រលាញ់ក្លឹបនេះ... ខ្ញុំមិនមែនជាប្រភេទមនុស្សដែលភ្លេចអតីតកាលទេ។ គ្រូបង្វឹកសញ្ជាតិហូឡង់កំពុងស្ថិតក្រោមសម្ពាធបន្ទាប់ពីការបញ្ចប់ក្នុងចំណាត់ថ្នាក់លេខ ៨ របស់ Man Utd កាលពីរដូវកាលមុន ដែលជាកម្រិតទាបបំផុតរបស់ពួកគេក្នុងប្រវត្តិសាស្ត្រ Premier League និងការបរាជ័យពីរលើកក្នុងការប្រកួតបើកឆាកចំនួន ៣របស់ពួកគេនៅដើមយុទ្ធនាការនេះ៕

ប្រភព៖ BBC