Mbappe នឹងអវត្តមាន ៣ ៤ ប្រកួតដ៏សំខាន់របស់ Real Madrid ដោយសាររបួស
ខ្សែប្រយុទ្ធ Kylian Mbappe របស់ក្លិប Real Madrid ទំនងអាចនឹងអវត្តមានពីទីលាន ៣ ឬ ៤ ប្រកួត ដោយសាររងរបួសភ្លៅ។ កីទ្បាករសញ្ជាតិបារាំងវ័យ ២៥ ឆ្នាំរូបនេះ ដែលបានចូលរួមជាមួយនឹងក្លិបយក្សអេស្ប៉ាញក្នុងរដូវកាលនេះ បន្ទាប់ពីកិច្ចសន្យារបស់រូបគេបានអស់សុពលភាពជាមួយនឹង Paris St-Germain រកបាន ១ គ្រាប់ជួយឱ្យក្រុម Real Madrid បានយកឈ្នះលើ Deportivo Alaves ៣-២ កាលពីថ្ងៃអង្គារ៍ទី២៤ ខែកញ្ញា មុនពេលផ្លាស់ប្តូរចេញនៅនាទី ៨០។
ក្រោយពីបញ្ចប់ការប្រកួតខាងលើនេះ លោក Carlo Ancelotti បាននិយាយថា៖ រូបគេមិនអីទេ ដោយសារតែប្រឹងលេងខ្លាំងពេក។ ដូច្នេះហើយ រូបគេក៏បានសុំខ្ញុំប្តូរចេញ ដើម្បីកុំឱ្យមានបញ្ហាខ្លាំងជាងនេះ។ តែនៅថ្ងៃពុធទី២៥ ខែកញ្ញា ក្លិប Real Madrid បានបញ្ជាក់ថា៖ បន្ទាប់ពីការតេស្ត៍លើកីទ្បាករវ័យ ២៥ ឆ្នាំរូបនេះត្រូវបានធ្វើរោគវិនិច្ឆ័យឃើញថារងរបួសសាច់ដុំភ្លៅ (biceps femoris) ផ្នែកខាងក្រោយ នៃជើងឆ្វេង។ ហើយរបួសខាងលើនេះក៏នៅបន្តតាមដានពិនិត្យមើលទៀតផងដែរ។ បញ្ហាខាងលើនេះនឹងធ្វើឱ្យក្រុម Real Madrid ប្រឈមមុខនឹងបាត់បង់ Mbappe ដែលជាកម្លាំងស្នូលដ៏សំខាន់ សម្រាប់ការប្រកួត La Liga ដែលត្រូវប៉ះគ្នាជាមួយនឹង Atletico Madrid នៅក្រៅដី នាថ្ងៃអាទិត្យនេះ បន្ទាប់មកប៉ះ Lille នៅ Champions League និង Villarreal ក្នុងការប្រកួតលីគកំពូលរបស់អេស្ប៉ាញ មុនពេល FIFA Day ក្នុងខែតុលា ឆ្នាំ២០២៤។
គួរឱ្យដឹងដែរថា Mbappe រកបាន ៦គ្រាប់ក្នុងការបង្ហាញខ្លួនលេងឱ្យ Real Madrid ចំនួន ៧ប្រកួត មុនពេលជួបបញ្ហារបួសខាងលើនេះ៕
