FIFA ព្យួរអ្នកចាំទីអាហ្សង់ទីន Martinez ពីរប្រកួត
សមាគមកីឡាបាល់ទាត់អាហ្សង់ទីន (AFA) បាននិយាយនៅក្នុងសេចក្តីថ្លែងការណ៍មួយកាលពីថ្ងៃសុក្រទី២៨ កញ្ញា ២០២៤ បានឱ្យដឹងថា៖ អ្នកចាំទីសញ្ជាតិអាហ្សង់ទីន Emiliano Martinez ត្រូវបាន FIFA ព្យួរការប្រកួតចំនួនពីរសម្រាប់ ពីបទប្រើប្រាស់អាកប្បកិរិយាប្រមាថ ។ បម្រាមនេះមានន័យថា Martinez នឹងខកខានការប្រកួតជម្រុះ World Cup ឆ្នាំ ២០២៦ ទល់នឹង Venezuela និង Bolivia នៅខែតុលា។
អ្នកចាំទីក្លឹប Aston Villa រូបនេះត្រូវបានផ្អាកផងដែរ ដោយសារមានឧប្បត្តិហេតុក្នុងការប្រកួតជាមួយក្រុមជម្រីសជាតិស៊ីលី និងកូឡុំប៊ីកាលពីដើមខែនេះ។
នៅក្នុងការប្រកួតនៅប្រទេសស៊ីលី ដែលជាលើកទីមួយរបស់គាត់ចាប់តាំងពីឈ្នះពានរង្វាន់ Copa America នៅសហរដ្ឋអាមេរិក លោក Martinez បានអបអរដោយធ្វើកាយវិការមិនសមរម្យគឺកាន់ពានរង្វាន់ចម្លង Copa América ទៅកាន់តំបន់ក្រលៀនរបស់គាត់ដូចដែលគាត់បានធ្វើបន្ទាប់ពីបានឈ្នះការប្រកួតបាល់ទាត់ពិភពលោកឆ្នាំ២០២២ នៅកាតា។
បន្ទាប់ពីចាញ់កូឡុំប៊ី កីឡាករវ័យ ៣២ ឆ្នាំរូបនេះបានបង្កកំហុសម្តងទៀតដោយបានវាយកាមេរ៉ាទូរទស្សន៍ក្នុងស្រុក។ សមាគមបាល់ទាត់អាហ្សង់ទីនAFA បាននិយាយនៅក្នុងសេចក្តីថ្លែងការណ៍មួយថា Emiliano Martinez បានទទួលខុសត្រូវចំពោះអាកប្បកិរិយាប្រមាថរបស់គាត់ និងការរំលោភលើគោលការណ៍នៃការលេងដោយយុត្តិធម៌ ប៉ុន្តែAFAមិនយល់ស្របនឹងការសម្រេចចិត្តរបស់គណៈកម្មាធិការវិន័យរបស់ FIFA ៕
