Man City គ្រោងចាយលុយជិត ៤០០លានដុល្លារ ដើម្បីកែកុនកីឡដ្ឋាន Etihad
Manchester City មានគម្រោងចំណាយទឹកប្រាក់ប្រមាណ ៣៧៥លានដុល្លារអាមេរិក ដើម្បីអភិវឌ្ឍកីឡដ្ឋាន Etihad ដែលជាមូលដ្ឋានឈរជើងរបស់ខ្លួន។ នេះបើតាមការចុះផ្សាយរបស់ BBC។
ប្រភពខាងលើបានឱ្យដឹងថា ផែនការនេះមានបំណងពង្រីកកីឡដ្ឋានបច្ចុប្បន្ន ដែលមានកៅអីចំណុះ ៥៣ ៤០០នាក់ ឱ្យឡើងទៅដល់ ៦ម៉ឺនកៅអី។ ជាមួយគ្នានេះដែរ គម្រោងនេះក៏រួមបញ្ចូលទាំង Sky Bar និងបន្ទប់សណ្ឋាគារចំនួន ៤០០បន្ទប់ រួមជាមួយនឹងហាងថ្មី និងសារមន្ទីររបស់ក្លឹប។
បើតាម BBC ខាងក្លឹបបានដាក់ពាក្យស្នើសុំទៅកាន់ក្រុមប្រឹក្សាទីក្រុងមេនឆឺស្ទើររួចរាល់ហើយ។
សូមជម្រាបផងដែរ កីឡដ្ឋាន Etihad ត្រូវបានសាងសង់នៅឆ្នាំ២០០២ សម្រាប់ប្រកួតកីឡាកុម្ម៉ុនវិល (Commonwealth) ដែលជាការប្រកួតស្តង់ដារអូឡាំពិកសម្រាប់ប្រទេសអតីតដែនដីអាណានិគមរបស់អង់គ្លេស។ កីឡាដ្ឋាននេះបានក្លាយជាទឹកដីរបស់ Man City តាំងពីឆ្នាំ២០០៣៕
