កីឡាការិនីឆ្នើមលំដាប់ពិភពលោក ស្រួង ភាវី៖ ក្ដីសុបិនរយៈពេល ១០ឆ្នាំក្លាយជាការពិត
កីឡាការិនីឆ្នើមលំដាប់ពិភពលោក ស្រួង ភាវី ថាក្ដីសុបិនរបស់ខ្លួនរយៈពេល ១០ឆ្នាំដែលចង់ប្រកួតលើទឹកដីកម្ពុជា និងតំណាងឲ្យកម្ពុជាក្លាយជាការពិតហើយក្នុងព្រឹត្តិការណ៍ស៊ីហ្គេម លើកទី៣២ ដែលជាប្រវត្តិសាស្ត្រនាពេលដ៏ខ្លីខាងមុខ។
កីឡាការិនី ស្រួង ភាវី បានឲ្យដឹងនៅពេលមកដល់កម្ពុជាកាលពីម្សិលមិញនេះថា វាពិតជារឿងរំភើបណាស់សម្រាប់ខ្លួនដែលបានមកពេលនេះក្នុងការត្រៀមការប្រកួតស៊ីហ្គេម លើកទី៣២ ដែលកម្ពុជាជាម្ចាស់ផ្ទះអំឡុងខែឧសភា ២០២៣ ខាងមុខនេះ។
ជើងខ្លាំងលំដាប់ពិភពលោកផ្នែកវិញ្ញាសាការ៉ុមខាងលើនេះបន្ថែមទៀតថា ការប្រកួតនៅស៊ីហ្គេម នេះគឺជាការបំពេញក្ដីស្រមៃរបស់ខ្លួនផងដែរ ដែលរយៈពេល ១០ឆ្នាំមកនេះចង់ប្រកួតលើកទឹកដីកម្ពុជា ចង់ប្រកួតតំណាងកម្ពុជា ចង់ចូលរួមលើកមុខមាត់កម្ពុជាលើទឹកដីកំណើតរបស់ខ្លួនក្នុងឱកាសណាមួយ។ ឥលូវនេះគឺនឹងបានសម្រេចហើយដោយរូបគេនឹងត្រូវប្រកួតក្នុងព្រឹត្តិការណ៍ស៊ីហ្គេម អំឡុងខែឧសភាឆាប់ៗនេះ។
មួយវិញទៀតកីឡាការិនីរូបនេះនឹងចូលរួមផ្សព្វផ្សាយក៏ដូចជាបណ្ដុះធនធានកីឡាករ កីឡាការិនីប្រភេទកីឡាស្នូកឃ័រឲ្យកាន់តែទូលំទូលាយមានគេស្គាល់ និងមានប្រជាប្រិយនៅកម្ពុជាឲ្យដូចនៅតាមបណ្ដាប្រទេសផ្សេងៗដែលគេកំពុងលេង។
រំលឹកដែរថា កីឡាការិនី ស្រួង ភាវី បានមកដល់ប្រទេសកម្ពុជាហើយកាលពីរសៀលថ្ងៃទី១៦ ខែមេសា ឆ្នាំ២០២៣។ កីឡាការិនីរបស់កម្ពុជារូបនេះនឹងមានការប្រកួតចែករំលែកបទពិសោធមួយនៅថ្ងៃទី២០ ខែមេសា ឆ្នាំ២០២៣ ក្នុងក្លឹបប៊ីយ៉ា Lux 98 មុនឈានដល់ការប្រកួតស៊ីហ្គេម លើកទី៣២ ខែឧសភា ខាងមុខនេះ៕
