Spurs ពិចារណាដេញគ្រូបណ្ដោះអាសន្នរបស់ខ្លួនចេញ ក្រោយចាញ់ Newcastle!!
ក្លឹប Tottenham Hotspur កំពុងតែពិចារណាបណ្ដេញគ្រូបណ្ដោះអាសន្នរបស់ខ្លួន លោក Cristian Stellini បន្ទាប់ពីក្លឹបនេះចាញ់យ៉ាងអាម៉ាស់ពេលប៉ះក្លឹប Newcastle United កាលពីថ្ងៃអាទិត្យ។ នេះបើតាមការចុះផ្សាយរបស់សារព័ត៌មាន The Athletic។
កាលពីថ្ងៃអាទិត្យកន្លងទៅនៅក្នុងទឹកដីរបស់ខ្លួន Newcastle បានលត់ Spurs យ៉ាងចាស់ដៃ ខណៈការប្រកួតបញ្ចប់ទៅក្នុងលទ្ធផល ៦ ទល់នឹង ១។
ប្រភពខាងលើបានឱ្យដឹងថា ប្រសិនបើការបណ្ដេញចេញនេះកើតឡើងមែន នោះលោក Ryan Mason អតីតខ្សែបម្រើ Spurs ហើយពេលនេះកំពុងតែកាន់តំណែងក្នុងនាមជាគ្រូបង្វឹកឈុតធំ នឹងឡើងធ្វើជាអ្នកចាត់ការស្ដីទី រហូតដល់ក្លឹបរកឃើញអ្នកចាត់ការថ្មីជាអចិន្ត្រៃយ៍។
សូមជម្រាបផងដែរ លោក Stellini បានឡើងកាន់ Spurs ជាបណ្ដោះអាសន្នកាលពីចុងខែមីនាកន្លងទៅ ក្រោយពេលដែលលោក Antonio Conte បានចែកផ្លូវជាមួយក្លឹប៕
