Rooney៖ “Man City នឹងមិនផ្តួល Real Madrid ទេ តែគឺទៅកម្ទេចពួកគេ”
បើទោះបីកាលនៅជាកីឡាករ Wayne Rooney ឈរជើងឲ្យក្លឹប Manchester United រាប់ជាក្លឹបគូប្រជែង របស់ Manchester City តែមកទល់ការប្រកួតខាងមុខ លោកក៏បានគាំទ្រក្លឹបអង់គ្លេសមួយនោះដែរ ក្នុងការឆ្ពោះទៅវគ្គផ្តាច់ព្រ័ត្រ និងឈានដល់វគ្គដណ្តើមពានរង្វាន់ UEFA Champions League។
នៅរយៈពេលមិនដល់ ៤៨ ម៉ោងទៀតទេ ក្លឹបស្តេចស Real Madrid នឹងត្រូវប៉ះក្លឹបមេឃខៀវ Manchester City នាវេលាម៉ោង ០២:០០ នាទីរំលងអាធ្រាត្រ ក៏នឹងមានផ្សាយបន្តផ្ទាល់លើទំព័រ CTS Sports។
ងាកទៅមតិយល់ឃើញរបស់ជើងចាស់សញ្ជាតិអង់គ្លេស បានលើកឡើង៖ “Manchester City នឹងមិនផ្តួល Real Madrid នោះទេ តែពួកគេនឹងទៅកម្ទេច Real Madrid តែម្តង”។ លោកបន្តពាក់ព័ន្ធនឹងទម្រង់លេងរបស់មនុស្សយន្ត Erling Haaland៖ “តើ Real Madrid នឹងអាចបញ្ឈប់ Haaland បានដោយរបៀបណា? ពួកគេមាន Rudiger មែនទេ តែយ៉ាងណាខ្ញុំ នៅតែគិតថាវាអត់អាចទៅរួចឡើយ”។
រំឭកឲ្យដឹងយុវជនវ័យ ២២ ឆ្នាំ បានសាងកំណត់ត្រាជាហូហែររួចមកហើយសម្រាប់ខ្លួនឯងនៅក្លឹបថ្មី City ហើយដំណើរឆ្ពោះទៅការលើកពាន UCL លើកដំបូងក្នុងអាជីព ក៏នៅតែស្ថិតក្រោមការរង់ចាំ។ ស្ថិតិរដូវកាល ២០២២/២៣ ឈរជើង ៤៦ ប្រកួត រកបាន ៥១ គ្រាប់និង Assist ដល់ ៨ លើកឯណោះ៕
ប្រភព:FotMob
