Man Utd ត្រៀមចាយលុយ ៦០ លានអឺរ៉ូ ថ្ពក់ចូលខ្សែការពារអាស៊ីថ្លៃបំផុតក្នុងលោក
ក្លឹបបិសាចក្រហម Manchester United ត្រូវបានរាយការណ៍ថា កំពុងចាប់អារម្មណ៍ចង់ចុះហត្ថលេខានាំយកតារាឆ្នើម Kim Min-jae នៅទីផ្សារដោះដូររដូវក្តៅខាងមុខ បន្ទាប់មើលឃើញទម្រង់លេងដ៏ល្អ របស់ខ្សែការពារសញ្ជាតិកូរ៉េខាងត្បូង ធ្វើបានជាមួយ Napoli ដល់លើកពានរង្វាន់ Serie A។
ជាការពិតកីឡាករវ័យ ២៦ ឆ្នាំ បានចូលមកជំនួសតំណែង Kalidou Koulibaly ដែល Napoli ផ្ទេរទៅឲ្យ Chelsea ហើយត្រឹមរដូវកាលដំបូង បានឃើញផលជោគជ័យ និងការកើនឡើងតម្លៃខ្លួន ដល់ល្មមអាចនាំផលចំណេញចូលក្លឹបអាណាព្យាបាលបាត់ទៅហើយ។
តាមសារព័ត៌មានអ៊ីតាលី Correire dello Sport ចុះផ្សាយ ក្លឹបដឹកនាំដោយអ្នកចាត់ការលោក Erik ten Hag បានមើលឃើញទេពកោសល្យរបស់ខ្សែការពារកណ្តាលខាងលើ ហើយកំពុងគិតនឹងលក់ចេញរវាង Victor Lindelof ឬអាចជា Harry Maguire នៅពេលដ៏ខ្លីខាងមុខ។
យើងមិនច្បាស់ដំណើរការផ្ទេរនឹងសម្រេចបានឬអត់ ដ្បិតសាមីខ្លួនផ្ទាល់ បានលើកឡើងតាំងដើមរដូវកាល៖ “វាមានរឿងផ្ទេរចេញជាច្រើនអំពីខ្ញុំ តែនេះខ្ញុំទើបបានមកចូលរួមនៅ Napoli ត្រឹមរយៈពេល ៦ ខែប៉ុណ្ណោះ ហើយចចាមអារ៉ាមតែងតែរំខានដល់អាជីពរបស់ខ្ញុំ”៕
ប្រភព៖ SportBible
