PSG ចាប់ផ្តើមងាកចាប់អារម្មណ៍លើលោក Mourinho មកជំនួសតំណែងរបស់ Galtier

បើតាមការចុះផ្សាយចុងក្រោយមួយ ពី RMC Sport ថ្មីៗនេះ បានបង្ហាញឱ្យដឹងថា ក្លិបយក្សបារាំង Paris Siant-Germain កំពុងពិភាក្សាជាមួយអ្នកតំណាងរបស់លោក Jose Mourinho គឺលោក Jorge Mendes នៅពេលពួកគេកំពុងសម្លឹងរកអ្នកមកជំនួសតំណែងរបស់គ្រូបង្វឹកបច្ចុប្បន្ន លោក Christophe Galtier ។

ជាក់ស្តែងក្លិប PSG បានសម្រេចនាំយក លោក Galtier មកធ្វើជាអ្នកចាត់ការរបស់ខ្លួន កាលពីរដូវក្តៅមុន ក្រោយសម្រេចចិត្តចែកផ្លូវគ្នាជាមួយលោក Pochettino។ ប៉ុន្តែយ៉ាងណាក៏ដោយ គ្រូបង្វឹកថ្មីរូបនេះ ហាក់មិនបានបង្ហាញភាពលេចធ្លោណាមួយនោះឡើយ ដោយបានដឹកនាំក្រុមធ្លាក់ចុះពីពាន UCL និង French Cup ។

ដូច្នេះហើយ ទើបមានរបាយការណ៍ចុងក្រោយ បានបង្ហាញថាក្លិប PSG អាចនឹងចែកផ្លូវជាមួយ លោក Galtier នៅចុងបញ្ចប់នៃរដូវកាលនេះ បើទោះបីជាកិច្ចសន្យារបស់បុរសសញ្ជាតិបារាំងរូបនេះ ដំណើរការរហូតដល់ឆ្នាំ ២០២៤ ក៏ដោយ។

ទន្ទឹមនឹងនេះ យោងតាមប្រភពខាងលើ បានបង្ហាញថាគ្រូបង្វឹករបស់ក្រុម AS Roma លោក Mourinho ហាក់កំពុងក្លាយជាបេក្ខភាពដ៏សំខាន់មួយ សម្រាប់ថ្នាក់ដឹកនាំរបស់ក្រុម PSG គឺលោក Luis Campos ដោយអ្នក​ទាំង​ពីរ​ ធ្លាប់បាន​ស្គាល់​គ្នា​យ៉ាងជិត​ស្និទ្ធ​៕

ប្រភព: Sportskeeda