Gundogan ស៊ូកាត់បន្ថយប្រាក់ឈ្នួល ឲ្យតែបានចេញពី City ផ្លាស់ទៅចុះចូលនៅ Barcelona
ខ្សែបម្រើឆ្នើមសញ្ជាតិអាល្លឺម៉ង់ Ilkay Gundogan ត្រូវបានរាយការណ៍ថា កំពុងចាប់អារម្មណ៍ការផ្ទេរទៅក្លឹបថ្មី Barcelona ជាខ្លាំង ដ្បិតបើដឹងថា ការទៅចុះចូលនៅទីនោះ នឹងតម្រូវឲ្យខ្លួនកាត់បន្ថយប្រាក់ឈ្នួលមួយផ្នែកធំក៏ពិតមែន។
តាមកាសែត Mundo Deportivo ចុះផ្សាយ Gundogan នឹងសុខចិត្តកាត់ប្រាក់ឈ្នួលខ្លួនឯង ពោលទទួលទាបជាងមុនឆ្ងាយក៏ដោយ ឲ្យតែបានផ្ទេរទៅក្លឹបម្ចាស់ដី Camp Nou។ តាមដំណឹងលេចលឺមក ខាងក្លឹបអេស្ប៉ាញចង់ផ្តល់កុងត្រាថ្មី ៣ ឆ្នាំឲ្យកីឡាករ ខណៈខាង City ប្រុងបន្តថ្មីថែម ១ ឆ្នាំទៀតប៉ុណ្ណោះ។
ចំណុចនេះ កីឡាករវ័យ ៣២ ឆ្នាំមើលឃើញថា ភាពនឹងធឹងយូរអង្វែងទៅមុខ គឺជារឿងល្អសម្រាប់អាជីពខ្លួន ពោលមិនមែនជាការក្តោបប្រាក់ដ៏ច្រើនសន្ធឹកនោះឡើយ។ មួយផ្សេងទៀត Gundogan គិតគូរចង់រកកន្លែងសមគួរឲ្យក្រុមគ្រួសារ ប្រពន្ធកូនរស់នៅបានជាប់លាប់ ជាជាងការប្តូរចេញឥតគោលដៅ។
គួរឲ្យដឹងថារដូវកាល ២០២២/២៣ គេបង្ហាញខ្លួនសរុប ៤៦ ប្រកួត ក៏រកបាន ៧ គ្រាប់និង Assist ៦ លើក ក្រោមការដឹកនាំរបស់លោក Pep Guardiola។ កីឡាករលេងតំណែងបម្រើ នឹងមានវត្តមានជាថ្មីនៅការប្រកួតជើងទី ២ ទល់ Real Madrid នាកំឡុងពាក់កណ្តាលសប្តាហ៍ក្រោយ បន្ទាប់ព្យួរឈ្មោះក្រោយគ្រប់ចំនួនកាតពិន័យរបស់ UEFA៕
ប្រភព៖ Mundo Deportivo
