Arsenal ត្រៀមលុយ ៩២ លានផោន ថ្ពក់យក Declan Rice មកចុះចូលក្លឹប
ក្លឹបកាំភ្លើងធំ Arsenal ត្រូវបានគេរាយការណ៍ថា កំពុងត្រៀមកញ្ចប់ប្រាក់ដ៏ច្រើនសន្ធឹកល្បាក់ ៩២ លានផោន បើកការចរចាអូសទាញចិត្ត Declan Rice ចេញពីក្លឹបញញួរធំ West Hamm United ឲ្យទាល់តែបាននៅទីផ្សារដោះដូរក្រោយបញ្ចប់រដូវកាលខាងមុខ។
ជាការពិតកីឡាករអង់គ្លេសក៏ល្ហៀងៗប្រុងចង់ចាកចេញពីក្លឹបស្ថិតក្នុងទីក្រុងឡុងផងដែរ បន្ទាប់តែស្ថានភាពរបស់ West Ham នាំឲ្យគេខកខានការប្រកួតពានអឺរ៉ុប Champions League ម្តងហើយម្តងទៀត ដោយឡែកការផ្ទេរទៅ Arsenal សព្វថ្ងៃជាក្លឹបបានធានាកៅអីរួចរាល់នារដូវកាលបន្ទាប់។
តាមសារព័ត៌មាន The Telegraph ចុះផ្សាយថា ក្លឹប Arsenal បានប្រុងនឹងដាក់សំណើនោះទៅហើយ ក៏រំពឹង West Ham នឹងព្រមទទួលយក ដ្បិតកន្លងមកលឺដំណឹងភាគីអាណាព្យាបាលចង់បានដល់ ១០០ លានផោន។ ការចាកចេញរបស់ Granit Xhaka ជាចំណែកមួយប្រមូលលុយ មកទិញយក Rice ដើម្បីបំពេញតំបន់ស្នូល។
រំឭកឲ្យដឹងថា កីឡាករវ័យ ២៤ ឆ្នាំ ស្ថិតិរដូវកាលនេះ បង្ហាញខ្លួន ៤៦ ប្រកួត ក៏រកបាន ៤ គ្រាប់និង Assist ៤ លើក។ ទន្ទឹមសុពលភាពកុងត្រាសេសសល់ដល់ចុងខែមិថុនា ឆ្នាំក្រោយ បែបនេះ West Ham ក៏មិនអាចអូសបន្លាយពេលលក់ចេញតទៅទៀតដែរ៕
ប្រភព៖ The Telegraph
