Spurs សម្លឹងចង់យក Mendy ចេញពី Chelsea មកទុកជំនួសតំណែង Lloris
ក្លឹបមាន់ខ្នាយមាស Tottenham Hotspur ត្រូវបានរាយការណ៍ថា កំពុងចាប់អារម្មណ៍ចង់នាំយកអ្នកចាំទីដៃថ្មី Edouard Mendy ចេញពីក្លឹបតោខៀវ Chelsea ដើម្បីទុកបម្រុងក្នុងការជំនួសកន្លែង Hugo Lloris ដែលត្រូវចាកចេញនៅពេលដ៏ខ្លីខាងមុខ។
ជាការពិតកីឡាករចាស់វស្សារបស់ក្លឹប Spurs ចាយពេល ១៣ ឆ្នាំមកហើយ ជាមួយក្លឹបក្នុងទីក្រុងឡុង ខណៈកុងត្រាក៏ចូលមកដល់ទីបញ្ចប់ពេលខាងមុខ ហើយមិនមានការគិតគូរបន្តថ្មីឡើយ ដ្បិតអីអ្នកចាំទីវ័យ ៣៦ ឆ្នាំ ហាក់សម្លឹងការផ្ទេរទៅក្លឹប Al Hilal នៅអារ៉ាប៊ីសាអូឌីតឯ ណោះ ល្ហៀងៗអាចរកបាន ១,៣ លានអឺរ៉ូ/ខែ ជាទំហំប្រាក់ដ៏ច្រើនក្រាស់
ចំណែក Spurs ដឹកនាំដោយប្រធានលោក Daniel Levy ក៏មិនគិតចង់រក្សា ហើយមានតែចាត់ចែងការនាំចូលអ្នកថ្មី រីឯគោលដៅដំបូងបានសម្លឹងឃើញកីឡាករសេណេហ្គាល់ Mendy ដែលលែងជាដៃទីមួយរបស់តោខៀវ។ នេះបើតាមសារព័ត៌មាន The Sun បានចុះផ្សាយ។
កីឡាករវ័យ ៣១ ឆ្នាំ ក៏ទំនងគិតចង់ចាកចេញពីក្លឹបម្ចាស់ដី Stamford Bridge ដូចគ្នា ស្របពេលហាងឆេងតម្លៃខ្លួន អាចមិនដល់ ១៥ លានផោនឡើយ បើទោះបីកុងត្រាសេសសល់យូរដល់ចុងខែមិថុនា ឆ្នាំ ២០២៥៕
ប្រភព៖ The Sun
