Oscar បង្ហើបក្តីស្រមៃចង់វិលត្រលប់មកកាន់ក្លិប Chelsea វិញ មុនបញ្ចប់អាជីព
មីៗនេះ អតីតតារាឆ្នើមរបស់ក្រុមតោខៀវ Chelsea កីឡាករ Oscar បាននិយាយថាគេនៅតែមានក្តីស្រមៃធំ ក្នុងការវិលត្រលប់ទៅកាន់ទឹកដី Stamford Bridge វិញ ហើយសង្ឃឹមថារឿងនេះ អាចនឹងកើតឡើង មុនពេលគេត្រូវបញ្ចប់អាជីពពីបាល់ទាត់ ។
ជាក់ស្តែង កីឡាករសញ្ជាតិប្រេស៊ីលរូបនេះ ធ្លាប់បានចាយពេលរហូតដល់ទៅ ៤ រដូវកាល ជាមួយក្រុម Chelsea ចាប់ពីឆ្នាំ ២០១២ ដល់ ២០១៦ ដោយបង្ហាញខ្លួនសរុប ២០០ ប្រកួត រួមទាំងបានឈ្នះពាន PL និង Europa League ផងដែរ ។
យ៉ាងណាក៏ដោយ Oscar បានសម្រេចដើរចេញពី Chelsea ដើម្បីផ្ទេរទៅនៅក្នុងក្របខ័ណ្ឌ Chinese Super League ដោយបានចុះហត្ថលេខាជាមួយ Shanghai SIPG ក្នុងតម្លៃ ៦៧ លានផោន ហើយរហូតពេលបច្ចុប្បន្ននេះ គេនៅតែបន្តលេងនៅប្រទេសចិនដដែល ប៉ុន្តែយ៉ាងណាគេបានសារភាពថានឹងពេញចិត្តក្នុងការវិលមក Chelsea វិញ នៅពេលណាមួយ។
លើសពីនេះ កីឡាករសញ្ជាតិប្រេស៊ីល បាននិយាយប្រាប់ទៅកាន់ talkSPORT ថា ៖ “វាជាក្តីសុបិនមួយក្នុងការត្រលប់មក Chelsea វិញ។ គ្រប់គ្នាដឹងពីចំណង់ចំណូលចិត្ត ដែលខ្ញុំមានចំពោះក្លឹបនេះ។ ខ្ញុំមានអនុស្សាវរីយ៍ល្អៗជាច្រើននៅទីនោះ… ខ្ញុំនៅតែមានសុបិនចង់លេងឲ្យក្រុមនេះ។ ដូច្នេះប្រសិនបើខ្ញុំអាចត្រឡប់មកអឺរ៉ុបវិញ ឬទៅ Chelsea វិញ ខ្ញុំសង្ឃឹមថាវានឹងអាចកើតឡើងមុនពេលបញ្ចប់អាជីព “៕
ប្រភព: Metro
