Benzema ត្រូវបានក្លឹបគូប្រជែង Ronaldo ដាក់សំណើចង់បាន ហ៊ានផ្តល់ជូន ២០០ លានអឺរ៉ូ
ទន្ទឹមនឹងសុពលភាពកុងត្រារបស់កីឡាករបារាំងត្រូវផុតនៅឆ្នាំក្រោយ បូកផ្សំនឹងស្ថានភាពនៃការចាកចេញស្ថិតនៅភាគរយខ្ពស់ ក៏នាំឲ្យក្លឹបស្ថិតនៅដីអារ៉ាប៊ីសាអូឌីតឯណោះ បានដាក់ក្រសែភ្នែកចង់បាន Karim Benzema ជាពន់ពេក ទៅចូលរួមនៅរដូវកាលបន្ទាប់។
នោះគឺ Al Ittihad ជាក្លឹបកំពុងឈរកំពូលតារាង Saudi Pro League សម្រេចក្លាយជាម្ចាស់ជើងឯក ក៏រាប់ជាក្លឹបគូប្រជែងកាន់ឆ្នាំមួយដែរ របស់ក្លឹប Al Nassr ជាក្លឹប Cristiano Ronaldo មិត្តចាស់កីឡាករ Real Madrid កំពុងឈរជើង។
ដើមឡើយមានសំណើលើកដំបូង ដែលក្លឹប Al Ittihad ផ្តល់ជូន គឺត្រូវបានខ្សែប្រយុទ្ធវ័យ ៣៥ ឆ្នាំ បដិសេធ ដល់ហើយនេះជាសំណើថ្មី ដាក់ថ្លៃឈ្នួលផ្តល់ជូន Benzema ខ្ពស់កប់ពពកជាងមុន ពោលសន្យាផ្តល់ជូន ២០០ លានអឺរ៉ូ នៅរយៈពេល ២ រដូវកាល មានន័យថា មួយរដូវកាល ១០០ លានអឺរ៉ូ ឲ្យតែគេព្រមមកចុះចូល។
ទំហំនេះ ធៀបនឹងទំហំប្រាក់ឈ្នួលសព្វថ្ងៃដែល Benzema រកបាននៅក្លឹបម្ចាស់ដី Bernabeu គឺខុសគ្នាគុណជា ៤ ឯណោះ ដ្បិតសព្វថ្ងៃរកបានល្បាក់ ២៥ លានអឺរ៉ូ/ឆ្នាំ នៅអធិរាជស។ រំឭកថារដូវកាល ២០២២/២៣ សម្រាប់កីឡាករខាងលើធ្វើបានល្អគួរសម ដ្បិតរបួសញាំញី ក៏នៅអាចបង្ហាញខ្លួន ៤២ ប្រកួត រកបាន ៣០ គ្រាប់និង Assist ៦ លើកផងដែរ៕
ប្រភព៖ DailyPost
