Jude Bellingham កីឡាករគោលដៅ Real Madrid ត្រលប់ទៅអង់គ្លេស ទាំងរបួសជើង
បន្ទាប់បញ្ចប់រដូវកាលនៅ Bundesliga កីឡាករទាំងអស់ក៏បានចាប់ផ្តើមវិលមកប្រទេសកំណើត ឬទៅប្រទេសផ្សេងៗ ដើម្បីរីករាយនឹងដំណើរវិស្សមកាលរយៈពេលខ្លី មុនចាត់ចែងការចរចាកុងត្រា ការផ្ទេរចេញ ឬត្រៀមសម្រាប់ការប្រកួតឲ្យជម្រើសជាតិពេលខាងមុខ។
ងាកមក Jude Bellingham សមាជិករបស់ក្លឹប Borussia Dortmund មានភាគរយខ្ពស់ នឹងផ្លាស់ទៅក្លឹបអធិរាជស Real Madrid ពេលនេះ បានត្រលប់មកទឹកដីអង់គ្លេស ជាទីតាំងកំណើត តែប្រទះឃើញកីឡាករបានជួបបញ្ហារបួស ត្រង់ផ្នែកជង្គង់ខាងស្តាំរបស់គេ។ នេះបើតាមរូបភាពផ្តិតបានដោយអ្នកថតរូប Florian Groeger។
នេះទាំងដែល Bellingham មិនទាន់ប្រកាសការផ្ទេរទៅក្លឹបនៅទឹកដីអេស្ប៉ាញផង ហាក់ឲ្យតម្រុយអវិជ្ជមានជាមុនបាត់ទៅហើយ។ ក៏នាំឲ្យអ្នកគាំទ្រមួយចំនួនមានការព្រួយបារម្ភ ខ្លាចក្រែងខ្សែបម្រើខាងលើ មកចូលរួមនៅស្តេចស ដូចករណី Eden Hazard រមែងមានរបួសញាំញីឥតឈប់ ហើយធ្លាក់ទម្រង់ទៅវិញ។
យើងមិនទាន់ច្បាស់អំពីការសម្រេចចរចាបែបណាទេ ដឹងត្រឹមកីឡាករវ័យ ១៩ ឆ្នាំ ទំនងចាយពេលសម្រាកមួយរយៈសិន ហើយខណៈនេះ ក៏មិនទាន់មានដំណឹងអ្វីថ្មី ដែលត្រូវមកអាប់ដែតចែកជូនបងប្អូននោះដែរ៕
ប្រភព៖ BeSoccer
