គ្រូធំ Xavi បង្ហើបត្រង់ៗចង់បាន Cancelo មកចូលរួមក្រុម នៅរដូវកាលក្រោយ

ថ្មីៗនេះ គ្រូបង្វឹករបស់ក្លិប Barcelona លោក Xavi បានបង្ហើបថាក្លិបរបស់ខ្លួន ចង់ចុះហត្ថលេខាលើខ្សែការពារ Joao Cancelo ក្នុងលក្ខខណ្ឌខ្ចីជើងពីក្រុម Manchester City នៅពេលទីផ្សារដោះដូរកីឡាករបើកឡើងវិញ នារដូវក្តៅខាងមុខ។

ជាក់ស្តែង​ Cancelo ត្រូវបានក្រុម Man City អនុញ្ញាតឱ្យផ្ទេរទៅចូលរួមជាមួយ Bayern Munich ក្នុងលក្ខខណ្ឌខ្ចីជើង កាលពីខែមករាកន្លងទៅ ហើយក្នុងអំឡុងពេលនេះ គេបានបង្ហាញខ្លួន ២១ លើកសម្រាប់ក្រមម្ចាស់ជើងឯក Bundesliga ដោយរកបាន ១ គ្រាប់និង assists ៦ លើក ប៉ុន្តែគេមិនរំពឹងថានឹងផ្ទេរមក​ទឹកដី Allianz Arena ជាអចិន្ត្រៃយ៍នោះឡើយ។

យ៉ាងណាមិញ ក្លិប Barcelona ត្រូវបានគេរាយការណ៍មកថា មានទំនាក់ទំនងយ៉ាងខ្លាំង ជាមួយ Cancelo ដោយក្លិបអេស្ប៉ាញមួយនេះ កំពុងមានបំណងស្វែងរកជម្រើសខ្សែការពារថ្មី ដើម្បីមកពង្រឹងក្រុមរបស់ខ្លួនបន្ថែម នៅទីផ្សារខាងមុខ ។

ហើយឥឡូវនេះ គ្រូបង្វឹកលោក Xavi ក៏បានចេញមុខបញ្ជាក់យ៉ាងច្បាស់ផងដែរថា ដោយបង្ហើបថា Barca ចង់ចុះហត្ថលេខាលើកីឡាករសញ្ជាតិព័រទុយហ្គាល់ ក្នុងលក្ខខណ្ឌខ្ចីជើង ពីក្រុម Man City ។

មិនតែប៉ុណ្ណោះ របាយការណ៍ថ្មីៗនេះ បានអះអាងទៀតថា Man City ទំនងជាចង់លក់ Cancelo ចេញ ក្នុងត្លៃខ្លួន ៤០ លានអឺរ៉ូ នៅរដូវក្តៅខាងមុខ ប៉ុន្តែឱកាសក្នុងការផ្ទេរទៅកាន់ទឹកដី Camp Nou ក្នុងលក្ខខណ្ឌខ្ចីជើង ក៏អាចនឹងទៅរួចផងដែរ ដោយក្លិបអង់គ្លេស ចង់ដាក់បញ្ចូលជម្រើសទិញផ្តាច់ ក្នុងនោះ ៕

ប្រភព: Sportsmole