Jack Grealish ថាអត់ដឹងទាំងខ្លួនឯងបង្កកំហុសផង តែយ៉ាងណាអរគុណ Gundogan ជាពិសេស
តាមថាក្លឹបមេឃខៀវ Manchester City កាលពីយប់មិញ ទន្ទឹមនឹងជ័យជម្នះលើកពានរង្វាន់ ពួកគេក៏អាចចារកំណត់ត្រាជាក្លឹបមិនរបូតសូម្បីមួយគ្រាប់នៅក្របខ័ណ្ឌ FA Cup ពេញមួយរដូវកាល តែសោកស្តាយបែរត្រូវភ្លាត់នឹងផ្តល់មួយគ្រាប់ជូន Manchester United ក៏ដោយសារបាល់ពិន័យ ១១ ម៉ែត្រ។
វាជាកំហុសរបស់ Jack Grealish ក្រោយអាជ្ញាកណ្តាលឆែកមើលប្រព័ន្ធ VAR ឃើញថាខ្សែប្រយុទ្ធអង់គ្លេសបានរារាំងបាល់ដោយប៉ះត្រង់ផ្នែកដៃ ក្នុងប្រអប់គ្រោះថ្នាក់ ហើយតាមការសម្រេចរបស់អាជ្ញាកណ្តាលក៏ផ្តល់ជូនបាល់ប៉េណាល់ រួច Bruno Fernandes ជាអ្នកស៊ុតយកតាមស្មើ ១-១ ពេលអ្នកចាំទី Stefan Ortega លោតទៅខុសខ្យល់បាល់។
ងាកទៅការលើកឡើងរបស់ Grealish ប្រាប់ប៉ុស្តិ៍ BBC ក្រោយចប់ការប្រកួត៖ “ខ្ញុំនិយាយស្មោះត្រង់ ខ្ញុំអត់ដឹងថាវាជាកំហុស នាំឲ្យកើតបាល់ប៉េណាល់ទីផង នេះខ្ញុំអត់បានទាំងសម្លឹងទៅបាល់ ដឹងត្រឹមខកខានការតែតត្រង់ការប្រើប្រាស់ក្បាល”។
គេបន្ត៖ “ខ្ញុំអាចយល់ បើខ្ញុំព្យាយាមប្លុកការក្រុសចូលនោះ តែយ៉ាងណាមិនអីទេ គ្រប់យ៉ាងគឺ Gundogan បានសង្គ្រោះខ្ញុំឡើងហើយ”។ ជាការពិតប្រកួតនោះ ត្រូវបានខ្សែប្រយុទ្ធស្លាប Ilkay Gundogan កាប់ Volley ពីរជើងចូលស្អាតហួស ផុតដៃអ្នកចាំទី David de Gea យកបានជ័យជម្នះ៕
ប្រភព៖ SportBible
