Pochettino នឹងមិនព្រមព្រលែងឱ្យ Havertz ផ្ទេរទៅចូលរួមជាមួយ R.Madrid ដាច់ខាត

ថ្មីៗនេះ អ្នកចាត់ការក្រុមថ្មីរបស់តោខៀវ Chelsea លោក Mauricio Pochettino ត្រូវបានគេរាយការណ៍មកថា មានគម្រោងក្នុងការរក្សាទុកខ្សែប្រយុទ្ធ Kai Havertz ឱ្យស្នាក់នៅក្រុមរបស់ខ្លួនបន្ថែមទៀត នៅរដូវកាលក្រោយនេះ ។

ជាក់ស្តែងការលើកឡើងបែបនេះ បន្ទាប់ពីមានព័ត៌មានលេចលឺមកថា ក្រុម Real Madrid ហាក់កំពុងមានគម្រោងធំ ក្នុងការស្វែងរកលទ្ធភាពចុះហត្ថលេខាលើតារាឆ្នើមសញ្ជាតិអាល្លឺម៉ង់រូបនេះ ជាពិសេសនៅពេល Karim Benzema បានប្រកាសចាកចេញ រួមជាមួយ Marco Asensio និង Eden Hazard ។

មិនតែប៉ុណ្ណោះ បើតាមរបាយការណ៍ចុងក្រោយមួយ បានបង្ហាញថា គ្រូបង្វឹកលោក Carlo Ancelotti គឺជាអ្នកគាំទ្ររបស់ Havertz ដោយមើលឃើញថាកីឡាករវ័យ ២៣ ឆ្នាំរូបនេះ មានសមត្ថភាពអាចលេងបានទាំងតំបន់ប្រយុទ្ធស្លាប និងកណ្តាល ។

ប៉ុន្តែទោះជាយ៉ាងណាក៏ដោយ បើតាមកាសែតអេស្ប៉ាញ AS បានបង្ហាញថា លោក Pochettino បានចាត់ទុក Havertz ជាផ្នែកដ៏សំខាន់មួយ សម្រាប់ក្រុមរបស់ខ្លួន នៅរដូវកាលក្រោយនេះ ហើយបានស្នើសុំក្លិប មិនឱ្យលក់គេចេញទៅណាជាដាច់ខាត៕

ប្រភព: Sportsmole