អ្នកគាំទ្រ Messi នៅហុងកុងទទួលបានលុយ ៥០ ភាគរយមកវិញ

អ្នក​គាំទ្រ​ដែល​បាន​ទិញ​សំបុត្រ​ទស្សនាការប្រកួតមិត្តភាពទេសចរណ៍របស់ Lionel Messi ជាមួយនឹងក្រុមចម្រុះតារាបាល់ទាត់ទីក្រុង​ហុងកុង នឹង​ទទួល​បាន​ប្រាក់​សំណង ៥០ ភាគរយមកវិញ ជាមួយនឹងលក្ខខណ្ឌ​មិន​បន្តចាត់​វិធាន​ការ​ផ្លូវ​ច្បាប់។

អ្នករៀបចំការប្រកួត Tatler Asia កាលពីថ្ងៃចន្ទបានបង្វិលប្រាក់ ៥០ ភាគរយឱ្យអ្នកទិញតាមរយៈបណ្តាញផ្លូវការរបស់ខ្លួន ។ អ្នកទាំងឡាយណាដែលចង់បានប្រាក់មួយចំនួន ត្រឡប់មកវិញនឹងត្រូវយល់ព្រមតាមលក្ខខណ្ឌដែលរួមមានការមិនបន្តដំណើរការនៅចំពោះមុខតុលាការណាមួយនៃច្បាប់ សាលាក្តី (ឬ) អាជ្ញាធរបទប្បញ្ញត្តិ។

អ្នកគាំទ្របាល់ទាត់ទីក្រុងហុងកុងបានចំណាយចាប់ពី៨៨០ដុល្លារហុងកុងស្មើនឹងជាង១១០ដុល្លារអាមេរិកដើម្បីមើលការប្រកួតរបស់ម្ចាស់ពានរង្វាន់ Ballon d'Or ប្រាំបីសម័យកាលពីថ្ងៃទី ៤ខែកុម្ភៈក្នុងការប្រកួតទេសចរណ៍រវាងក្លិប Inter Miami ទល់នឹងក្រុម Hong Kong Select XI ដែលពេលនោះក្រុមរបស់ Messi ឈ្នះ ៤-១ ទោះគ្មានវត្តមានគាត់ក៏ដោយ។ អវត្តមានរបស់កីឡាករអាហ្សង់ទីនក្រោយហេតុផលរបួស បានធ្វើឱ្យអ្នកគាំទ្រខកចិត្តនិងខឹងសម្បារយ៉ាងខ្លាំង ខណៈប្រទេសចិនដែលមើលឃើញថាអវត្តមានរបស់Messi គឺជាការមើលងាយផ្នែកនយោបាយ៕

ប្រភព​៖ AFP