តារាឆ្នើម Real Madrid ចង់បានប្រពន្ធមិនទាន់គ្រប់អាយុ

តារាឆ្នើមរបស់ក្លិប Real Madrid កីឡាករ Endrick Felipe កំពុងធ្វើព្យុះធ្វើភ្លៀងទាំងក្នុង និងក្រៅទីលានប្រកួត។ បច្ចុប្បន្នគេកំពុងលេងឱ្យក្លិបបាល់ទាត់ប្រេស៊ីល Palmeiras បើទោះជា Real Madrid បានចុះហត្ថលេខាកាលពីថ្ងៃទី១៥ ខែធ្នូ ២០២២ ក៏ដោយ។

ខ្សែ​ប្រយុទ្ធ​ប្រេស៊ីល ​គ្រោង​នឹង​ផ្លាស់​ទៅក្លិប Real Madrid នៅ​រដូវ​ក្ដៅ​នេះ ប៉ុន្តែ​មុនទៅទីនោះយុវជន​រូប​នេះ​មាន​គម្រោង​រៀប​ការជាមុនសិន។  យោងតាមសារព័ត៌មាន Extra បានឱ្យដឹងថា Endrick បានសម្រេចចិត្តភ្ជាប់ពាក្យជាមួយមិត្តស្រីរបស់គាត់ឈ្មោះ Gabriely Miranda ដែលមានអាយុបងគាត់៣ ឆ្នាំ ខណៈដែលកីឡាកររូបនេះមិនទាន់គ្រប់អាយុ១៨ ឆ្នាំនៅឡើយទេ។

គូស្នេហ៍​មួយ​គូ​នេះ​ប្ដេជ្ញា​ធ្វើពិធីជា​ផ្លូវ​ការ​មុន​ការ​ផ្លាស់​ប្តូរ​ដ៏​ធំ​របស់ Endrick ទៅ Bernabeu ដែល​នឹង​ត្រូវ​ធ្វើឡើងនៅ​ពាក់​កណ្តាល​ខែ​កក្កដា។ Endrickនឹងមានអាយុ១៨ឆ្នាំ នៅខែកក្កដា ២០២៤។ បើទោះជាឪពុកម្តាយរបស់កីឡាករមិនប្រឆាំងនឹងទំនាក់ទំនងរបស់ពួកគេក៏ដោយ ប៉ុន្តែត្រូវបានមហាជនចាត់ទុកថាជាការសម្រេចចិត្តប្រញាប់ប្រញាល់ពេក ហើយចង់ឱ្យពួកគេរង់ចាំយូរបន្តិច ខណៈពេលនេះ Endrick គួរតែផ្តោតលើបាល់ទាត់ប្រសើរជាង៕