Pep បង្អួត​នាឡិកា​តម្លៃជាង ១ លានដុល្លារពេលប៉ះជាមួយ Real Madrid

គ្រូបង្វឹក Manchester City លោក Pep Guardiola បានពាក់នាឡិកាដ៏កម្របំផុតមួយក្នុងពិភពលោកមានតម្លៃប្រហែល១,៣លានដុល្លារ ក្នុងអំឡុងពេលធ្វើដំណើរទៅប្រកួត Champions League វគ្គ៨ ក្រុមជើងទី១ ជាមួយក្រុម Real Madrid កាលពីរាត្រីថ្ងៃអង្គារ។

នាឡិកាដែលលោក Guardiola ពាក់អំឡុងពេលប្រកួត Champions League នៅពហុកីឡដ្ឋាន Bernabeu ត្រូវបានរចនាឡើងដោយស្លាកយីហោលំដាប់ខ្ពស់ Richard Mille ដែលបង្កើតឡើងជាពិសេសសម្រាប់កំពូលកីឡាករតិន្នីស Rafael Nadal ។ ឈ្មោះផ្លូវការរបស់នាឡិកានេះគឺ Calibre RM27-01 ។ នាឡិកា​នេះ​ក៏​មាន​​​ចំណុចដាច់ៗពណ៌​លឿងព័ទ្ធជុំវិញ​ ដោយ​មាន​ចុង​ពណ៌​ក្រហម​នៅលើទ្រនិចចង្អុរ​​ម៉ោង។ លោក Richard Mille ហៅការច្នៃប្រឌិតនាឡិកានេះថាជាជ័យជំនះនៃវិស្វកម្ម និងបច្ចេកវិទ្យាដោយ ភាពច្នៃប្រឌិតបំផុតមួយក្នុងប៉ុន្មានឆ្នាំថ្មីៗនេះ។

នាឡិកាជំនាន់ 27-01 បានបំបែកឯតទគ្គកម្មពិភពលោកជានាឡិកាមេកានិចស្រាលបំផុតគ្រប់ពេលដែលមានទម្ងន់ ១៨,៨៣ ក្រាម រួមទាំងខ្សែដែលប្រើទីតាញ៉ូម អាលុយមីញ៉ូម និងលីចូមថ្នាក់ទីប្រាំសម្រាប់ផលិតវា។ក្រៅពីនេះវានៅមានបំពាក់បច្ចេកវិទ្យាទំនើបថែមទៀត។ វាក៏ជានាឡិកាដ៏កម្រណាស់នៅលើពិភពលោកដោយមានតែ៥០គ្រឿងប៉ុណ្ណោះ ហើយលោក Guardiola និង Nadal គឺជាមនុស្សពីរនាក់ក្នុងចំណោមអ្នកមានសំណាងពាក់វា ដូច្នេះប្រហែលជាវាមិនគួរឱ្យភ្ញាក់ផ្អើលទេដែលនាឡិកានេះមានតម្លៃជាង១លានដុល្លារនោះ៕