អាជ្ញាកណា្តលល្អបំផុតបីរូបក្នុងប្រវតិ្តសាស្ត្របាល់ទាត់

Pierluigi Collina ត្រូវបានចាត់គេចាត់ទុកថាជាអាជ្ញាកណ្តាលដ៏អស្ចារ្យបំផុតនៅក្នុងប្រវត្តិសាស្ត្របាល់ទាត់។ គាត់តែងតែទទួលបានការគោរពពីកីឡាករនៅក្នុងការប្រកួតដ៏សំខាន់បំផុត រួមទាំងការប្រកួតវគ្គផ្តាច់ព្រ័ត្រ World Cup ឆ្នាំ ២០០២ រវាងប្រេស៊ីល និងអាល្លឺម៉ង់ផងដែរ។

យើងកម្រឃើញកីឡាករស្រែកនិងប្រតិកម្មដាក់លោកអាជ្ញាកណ្តាលសញ្ជាតិអ៊ីតាលីនៅលើទីលានណាស់។ លោក Pierluigi Collina បានបម្រើការជាអាជ្ញាកណ្តាលក្នុងបញ្ជីរបស់ FIFA ពីឆ្នាំ ១៩៩៥ ដល់ឆ្នាំ ២០០៥ ។ គាត់ជាប់ពានរង្វាន់អាជ្ញាកណ្តាលល្អបំផុតប្រចាំឆ្នាំរបស់ FIFA ដែលមានកំណត់ត្រាប្រាំមួយដងជាប់ៗគ្នា ហើយត្រូវបានចាត់ទុកថាជាអាជ្ញាកណ្តាលល្អបំផុតក្នុងប្រវត្តិសាស្ត្របាល់ទាត់អន្តរជាតិ។លោកធ្លាប់ដឹកនាំការប្រកួតព្រឹត្តិការណ៍ធំៗមួយចំនួនដូចជាៈ ការប្រកួតយូរ៉ូ ១៩៩៦ បាល់ទាត់ពិភពលោក១៩៩៨- ២០០២ និង Euro ២០០៤។

ចំណែកឯលោក Markus Merk អតីតអាជ្ញាកណ្តាលបាល់ទាត់អាឡឺម៉ង់ត្រូវបានចាត់ទុកថាជាអាជ្ញាកណ្តាលបាល់ទាត់ល្អបំផុតលំដាប់ទី២ ហើយជាអ្នកកាន់កំណត់ត្រាដឹកនាំការប្រកួតចំនួនច្រើន​ជាងគេបំផុតនៅ Bundesliga ។ លោកទទួលពានរង្វាន់អាជ្ញាកណ្តាលល្អបំផុតប្រចាំឆ្នាំរបស់ FIFA បីដង និងល្អបំផុតរបស់អាឡឺម៉ង់ប្រចាំឆ្នាំ៦ដង។ លោកបានបង្ហាញខ្លួនជាលើកដំបូងក្នុងនាមជាអាជ្ញាកណ្តាល Bundesliga ក្មេងបំផុតដែលមិនធ្លាប់មានក្នុងឆ្នាំ១៩៨៨ ដែលពេលអាយុត្រឹមតែ ២៥ ឆ្នាំ។ លោកបានដឹកនាំការប្រកួតបាល់ទាត់នៅក្នុងព្រឹត្តិការណ៍កីឡាអូឡាំពិកឆ្នាំ ១៩៩២នៅទីក្រុង Barcelona ផងដែរ។

ដោយឡែកចំណាត់ថ្នាក់ទី៣បានទៅលើអាជ្ញាកណ្តាលអង់គ្លេសលោក Howard Web ។ថ្មីៗនេះ អតីតអាជ្ញាកណ្តាលបាល់ទាត់អង់គ្លេស Howard Webb បានប្រកាសចូលនិវត្តន៍ពីអាជ្ញាកណ្តាលកាលពីថ្ងៃទី៦ ខែសីហា ឆ្នាំ ២០១៤ ដើម្បីបម្រើការជានាយកបច្ចេកទេសនៃក្រុមប្រឹក្សាភិបាលការប្រកួតកីឡាអាជីព។ លោកបានបម្រើការជាអាជ្ញាកណ្តាលដែលចុះក្នុងបញ្ជីរបស់ FIFA ពីឆ្នាំ ២០០៥ដល់ឆ្នាំ ២០១៤ និងបានបម្រើការនៅក្នុងការប្រកួតក្របខ័ណ្ឌ Premier League ពីឆ្នាំ២០០៣ រហូតដល់ការចូលនិវត្តន៍នាពេលថ្មីៗនេះ។ ក្នុងឆ្នាំ ២០១០គាត់បានធ្វើជាអាជ្ញាកណ្តាលនៃការប្រកួតវគ្គផ្តាច់ព្រ័ត្រ UEFA Champions League និង FIFA World Cupវគ្គផ្តាច់ព្រ័ត្រ ហើយបានក្លាយជាអាជ្ញាកណ្តាលដំបូងគេដែលធ្វើដូច្នេះក្នុងឆ្នាំតែមួយ៕