អតីតខ្សែប្រយុទ្ធ Man Utd ត្រៀមខ្លួនអង្គុយកៅអីគ្រូបង្វឹក

Robin van Persie ដែលជាអតីតខ្សែប្រយុទ្ធក្រុម Arsenal និង Manchester United កំពុងតែឈានជិតដល់កិច្ចព្រមព្រៀងមួយដើម្បីក្លាយជាគ្រូបង្វឹករបស់ក្លឹប Heerenveen ។ ចាប់តាំងពីបញ្ចប់អាជីពជាកីឡាករក្នុងឆ្នាំ ២០១៩ Van Persie បានធ្វើការជាគ្រូបង្វឹកក្លឹបយុវជន Feyenoord ដែលអតីតជាក្លឹបបាល់ទាត់អាជីពរបស់គាត់ ។

Van Persie ក៏បានធ្វើជាគ្រូបង្វឹកក្រុមយុវជនអាយុក្រោម ១៨និងអាយុក្រោម១៩ឆ្នាំរបស់ Feyenoord នៅរដូវកាលនេះ ប៉ុន្តែបានបដិសេធសំណើរគ្រប់គ្រងក្រុមអាយុក្រោម២១ ឆ្នាំរបស់ Feyenoordខណៈដែលលោកចង់ដឹកនាំក្រុមឈុតធំតែម្តង។ យោងតាមសារព័ត៌មានហូឡង់ AD បានផ្សាយថាលោក Van Persie បានជួបពិភាក្សាជាច្រើនលើកជាមួយ Heerenveen ហើយភាគីទាំងពីរមានបំណងចង់ឈានដល់កិច្ចព្រមព្រៀងក្នុងពេលឆាប់ៗនេះ។

របាយការណ៍ដដែលបានអះអាងថា Heerenveen ដំបូងបានកំណត់គោលដៅលោក Maurice Steijn និង Rick Kruys ជាបេក្ខភាពដ៏មានសក្តានុពលសម្រាប់តួនាទីអ្នកគ្រប់គ្រងរបស់ពួកគេ ប៉ុន្តែឥឡូវនេះបានបង្វែរគោលដៅមក Van Persie វិញបន្ទាប់ពីអតីតខ្សែប្រយុទ្ធហូឡង់ចាប់អារម្មណ៍ក្នុងអំឡុងពេលពិភាក្សា។

 បច្ចុប្បន្ន Heerenveen ឈរនៅលេខរៀងទី១០ និងមាន ១២ ពិន្ទុពីលើក្រុមដែលត្រូវកាត់ចោល ប៉ុន្តែឈ្នះតែម្តងប៉ុណ្ណោះក្នុងការប្រកួតលីកចំនួន ៦ ចុងក្រោយរបស់ពួកគេ។ Van Persie បានត្រលប់ទៅ Manchester United កាលពីខែកុម្ភៈ ដើម្បីបញ្ចប់វគ្គបណ្តុះបណ្តាល UEFA Pro License របស់គាត់នៅឯទីលានហ្វឹកហាត់របស់ក្លឹប។

Van Persie បានចំណាយពេលបីថ្ងៃនៅ Carrington ជាកន្លែងដែលគាត់បានសង្កេតមើលវគ្គហ្វឹកហាត់របស់ United ជាមួយលោក Erik ten Hag និងជំនួយការរបស់គាត់គឺលោក Mitchell van der Gaag ។ គាត់ក៏បានចូលរួមទស្សនាការប្រកួតនៅពេលដែល United ឈ្នះ ៣-០ ប្រឆាំងនឹងក្រុម West Ham និងបានជួបជាមួយអតីតអ្នកចាត់ការទូទៅរបស់គាត់គឺលោក Sir Alex Ferguson ៕