ទោះបីជាកីទ្បាករបួសច្រើនមែន តែប្រធានក្លិប Chamkarmon Lion FC មិនមានក្តីបារម្ភទ្បើយ សម្រាប់ការប្រកួតវគ្គ ៤ក្រុមចុងក្រោយ

ទោះបីជាកីទ្បាកររបួសជាច្រើនក៏ពិតមែន ប៉ុន្តែប្រធានក្លិប Chamkarmon Lion FC លោក ណែម សុវឌ្ឍនៈ មិនមានក្តីបារម្ភទ្បើយ សម្រាប់ការប្រកួតវគ្គ ៤ក្រុមចុងក្រោយ នៃពានរង្វាន់​ Soccer League លើកទី៧ ឆ្នាំ២០២៤ បន្ទាប់ពីក្រុមរបស់លោកបានទម្លាក់ក្រុម Try All FC ចេញពីវគ្គ ៨ក្រុមចុងក្រោយ ដោយយកឈ្នះក្នុងលទ្ធផល ៣-១ នៅឯពហុកីទ្បដ្ឋានជាតិអូទ្បាំពិក កាលពីថ្ងៃទី២៥ ខែមិថុនា ឆ្នាំ២០២៤។ ជាការពិតណាស់! នៅក្នុងជំនួបដ៏តាងតឹងខាងលើនេះ សង្កើតឃើញថាក្រុមកីទ្បាកររបស់ក្លិប Chamkarmon Lion FC ហាក់បីជាមានរបួសជាច្រើន ដោយសារតែការប្រកួតនេះមិនថាក្រុម Chamkarmon Lion FC និង Try All FC គឺសុទ្ធតែចង់ឈ្នះរៀងៗខ្លួនម្តង និងដាក់សម្ពាធគ្នាទៅវិញទៅមកធ្វើឱ្យប៉ះទង្គិចគ្នាច្រើន។

យ៉ាងណា ក្រោយពីបញ្ចប់ការប្រកួតខាងលើនេះប្រធានក្លិប​ Chamkarmon Lion FC លោក ណែម សុវឌ្ឍនៈ បានប្រាប់ឱ្យដឹងថា៖ «ពាក់ព័ន្ធនឹងរឿងខាងលើនេះ! ទី១ គឺលើទីលានដោយសារពួកយើងលេងពីវគ្គជម្រុះរហូតដល់វគ្គ១៦ក្រុមចុងក្រោយ គឺលេងលើស្មៅសិប្បនិម្មិតទេ ប៉ុន្តែដល់វគ្គ ៨ក្រុម ក៏ដូចជាវគ្គ ៤ក្រុម និងវគ្គផ្តាច់ព្រ័ត្រពួកយើងនឹងលេងលើស្មៅធម្មជាតិ ដែលវាប្លែកសម្រាប់កីទ្បាកររបស់ពួកយើងតិចតួច។ ចំពោះវគ្គបន្តទៀតខ្ញុំគិតថាក្រុមរបស់ខ្ញុំនៅតែធ្វើបានល្អ ដោយសារពួកយើងនៅតែមុតមាំង ទោះបីជាមានកីទ្បាករជាប់ពិន័យ និងរបួស ប៉ុន្តែពួកយើងនៅតែមានកីទ្បាករល្អជាច្រើនទៀត ដែលអាចលេងបាននៅការប្រកួតបន្ទាប់»។

គួរបញ្ជាក់ថា បន្ទាប់ពីទ្បើងទៅវគ្គ ៤ក្រុមចុងក្រោយ នៃពានរង្វាន់ខាងលើនេះ ក្រុម Chamkarmon Lion FC នឹងត្រូវប៉ះជាមួយក្រុម Tofu Army FC ដែលបានយកឈ្នះលើក្រុម Royal Bassac FC ដោយបញ្ចប់លទ្ធផល ១-០ នៅវគ្គ ៨ក្រុមចុងក្រោយ កាលពីថ្ងៃទី២៦ ខែមិថុនា ឆ្នាំ២០២៤ នៅឯកីទ្បដ្ឋាន AIA៕