អាហ្សង់ទីនកោះហៅខ្សែប្រយុទ្ធ Alvarez ប្រកួតកីឡាអូឡាំពិក
កីឡាករ Julian Alvarez របស់ក្លឹប Manchester City ត្រូវបានក្រុមជម្រើសជាតិអាហ្សង់ទីនកោះហៅសម្រាប់ការប្រកួតព្រឹត្តិការណ៍កីឡាអូឡាំពិកនៅទីក្រុងប៉ារីស ប្រទេសបារាំង ដែលធ្វើអោយគាត់អាចនឹងខកខានការចាប់ផ្តើមរដូវកាល Premier League ២០២៤-២៥។ Alvarez ដែលបច្ចុប្បន្នកំពុងប្រកួតពានរង្វាន់ Copa America ត្រូវបានដាក់បញ្ចូលក្នុងក្រុមកីឡាករទាំង ១៨ នាក់របស់គ្រូបង្វឹកលោក Javier Mascherano ជាកីឡាករមួយក្នុងចំណោមកីឡាករដែលលើសអាយុទាំងបី រួមជាមួយកីឡាករ Geronimo Rulli និង Nicolas Otamendi ។
ក្រុមរបស់លោក Mascherano ត្រូវប្រកួតជាមួយប្រទេសម៉ារ៉ុក អ៊ីរ៉ាក់ និងអ៊ុយក្រែនក្នុងវគ្គចែកពូលក្នុងប្រទេសបារាំង។ ជាមួយនឹងការប្រកួតវគ្គផ្តាច់ព្រ័ត្រនៃព្រឹត្តិការណ៍អូឡាំពិកដែលនឹងធ្វើឡើងនៅថ្ងៃទី៩ខែសីហា មួយថ្ងៃមុនពេលការប្រកួតពានរង្វាន់ Community Shield របស់ Manchester City ទល់នឹង Manchester United មានន័យថាកីឡាកររូបនេះនឹងមិនបានចូលរួមប្រកួតទេ។ កាលពីរដូវកាលមុន កីឡាករវ័យ ២៤ ឆ្នាំបានបង្ហាញខ្លួន៥៤ប្រកួតគ្រប់ការប្រកួតទាំងអស់សម្រាប់ក្រុមរបស់លោក Pep Guardiola ច្រើនជាងកីឡាករដទៃទៀត។
យុទ្ធនាការ Premier League របស់ Manchester City ចាប់ផ្តើមនៅថ្ងៃទី ១៨ ខែសីហា ទល់នឹង Chelsea នៅពហុកីឡដ្ឋាប Stamford Bridge ។ Claudio Echeverri ក៏ត្រូវបានបញ្ចូលក្នុងក្រុមផងដែរ។ ក្មេងជំទង់រូបនេះបានចូលរួមជាមួយម្ចាស់ជើងឯក Premier League កាលពីខែមករា ប៉ុន្តែភ្លាមៗនោះបានត្រលប់ទៅ River Plate ក្នុងលក្ខខណ្ឌខ្ចីជើង។ Sergio Gomez ក៏ត្រូវបានអេស្ប៉ាញកោះហៅសម្រាប់ការប្រកួតនេះដែរ ដែលមានន័យថាលោក Guardiola មានកីឡាករបីនាក់ចូលរួមប្រកួតក្នុងការកីឡាអូឡាំពិករដូវក្ដៅក្នុងទីក្រុងប៉ារីស៕
